2012年10月11日星期四

♥ 柑 B 成長日誌 ♥ 第一個月 - 媽媽抑鬱了?

最記得老公一句 :「你番左屋企尼幾日都無見你笑過!」


一直不覺得自己有問題的我先開始正視自己O既情緒問題。


記得O係醫院果 2 日, 湊 BB 沒壓力, 因為就算有咩問題, 點唔識都有醫生同姑娘。


母乳

抑鬱始於我餵唔到母乳, 因為我O既懶惰, O係醫院補過幾次奶粉 (亦有幾餐是母乳), 柑 B 之後完全唔肯埋身!
我每日都後悔自己補奶粉, 於是連續 4 日, 找健康院母乳姑娘教餵, 而好不幸, 次次我都喊住走..
D 姑娘同我講, 10個 BB 可能有 1個o係補奶粉之後唔肯埋身, 而柑 B 個衰豬就係尼個 BB!


一將佢推向乳房, 佢就大大大喊, 死都唔合埋個口! 連姑娘都話好少有 d o甘惡o既 BB!


泵仲慘, 唔埋身已經好難有奶, 再加上我本身可能奶量唔多, 次次左右泵 30MINS, 先得 5ml! 真係想死!
由第一日姑娘叫我加油, 到第 4 日, 姑娘勸我: 其實餵奶粉唔代表唔錫 BB (因為我次次都喊, 好傷心, 情緒好差)


雖然諗通左, 到依家諗起都有 dd 唔開心!


結論: 我以過來人身份同大家 share, 如果決定餵母乳就真是不要補奶粉。
如果
餵唔到母乳咪餵奶粉 law, 唔開心都無用架 ~
食奶粉 BB 一樣長得很好 ~


黃疸


第一日去健康院, 黃疸高到要去醫院急症抽血 (後來先知好多 BB 都要抽)
第一次做媽媽, 咩都唔識, 又驚, 又緊張。


結果抽完血勉強不用入院, 不過日日要去健康院, 要連續去 5日。
於是根本沒休息, 日日 8:45AM 就同奶奶一齊同柑 B 去健康院。
傷口又痛, 行到拐拐下, 人又累又擔心, 真是完全沒休息 ...




結論
: 其實黃疸好普遍, 總之醫生話要入院照就入院照, 如果不用入院就不用想太多 ~


衰 d 講, 就算幾擔心, 幾緊張, BB 亦唔會因為你擔心而退黃, 可以做o既只係準時餵奶! (如果餵母乳就自己食多 d, 瞓多 d, 飲多 d 水, 等自己多 d 奶比 BB)




餵奶


因為柑 B 有黃疸, 姑娘話一餐都不能少。(因為黃疸BB 可能會因為太累而不能自己起身)
一定要準時 3小時食一次。
柑 B 中意嘆奶 (到依家都係), 食一餐成個鐘, 食完氹佢瞓, 之後好快又下一餐, 根本沒時間休息。
最慘係次次餵完夜奶我都瞓唔番 (太多野諗)


柑B 剛回家時, 用chu chu 樽餵, 30mins, 1安都飲唔到!
我又喊, 以為佢唔肯食奶 <---XD



後來愈諗愈唔對路, 於是我攞起個樽啜下, X 佢! 我都啜唔到!
個死人 chu chu 咀唔知埋左定點 ... 要再吉下個孔先飲到!
當堂想爆粗!!


結論: 一開始 3 小時餵一次的確比較辛苦, 到轉 4 小時一次後會好好多 ~
不過黃疸BB 要食多 D, 聽醫生指示很重要, 柑B 都是退黃後才轉 4 小時食一次。


另外是新的奶咀會比較硬, 如果蒸多幾次先用會比較好 ~
如果你見 BB 起勢o甘啜唔到可能係個咀有問題, 擔心之前先 check 一 check, 不要白白浪費眼淚!


肚瀉


BB 7日人仔時突然肚瀉, 1 日痾成 11次
於是又要去急症室, 不過還好睇 BB 不用等, 好快可以見醫生。
同化驗左大便又沒什麼, 便便隔天又正常了 ~




結論: 醫生話便便不是完全是水就 OK, 但擔心的話記得睇醫生, 因為 BB 缺水好大件事架!


扭計


柑B 應該都屬於兇猛型 BB, 因為佢惡起上來真是健康院 D 醫生同姑娘都話: 嘩, 尼個 BB 好惡死!
一開始對佢扭計真係完全沒辦法。





幾日人仔已經比佢食奶咀 ... orz!
仲要其實奶咀佢都麻麻地 like, 好勉強o甘食。



佢一喊, 一唔肯瞓我就好頭痛。
最慘抱住都喊, 個人好灰, 好累!


結論: 其實個個 BB 都o甘惡! 唔係得我O甘辛苦 (上 BK 大把媽媽 share 苦況)
到 BB 大個 dd 真是會好 d, 而且你自己會開始掌握到氹佢o既方法。


坐月


因為我o係奶奶家坐月, 我奶奶人超好, 煮野亦好食, 對 BB 亦有耐心。
不過始終不是自己屋企, 所以一開始非常不習慣, 有寄人籬下同比人監視o既感覺!


結論: 人係好快可以習慣不同環境, 到滿左月我仲賴死唔肯走住多左一個月 (有人照顧好爽), 結果比奶奶趕先走 XDDD
講笑, 其實是奶奶怕我地番工仲要餵夜奶太辛苦, 所以平日我地放工去睇下 BB 就番自己屋企住, 放假先接 BB 回家。


總結: 沒有人一開始就咩都識。

我識有人一成為媽媽就得心稱手, 但其實大部份新手媽媽都有同樣煩惱。
有唔開心一定要同人講, 老公又好, 朋友又好, 姑娘又好, 不要屈o係心!


記得我果時日日喊住打比表姐 (佢生左 BB 半年), 佢對我幫我好多, 真是無左佢唔知點算。
之後 D 同事打比我, 我又一路講一講喊!
我去健康院亦有同姑娘傾 (又喊), 姑娘話頭一星期有尼 D 情緒係正常架!
不過如果超過一星期仲係O甘就可能真係抑鬱! 要注意呀!


到依家, 睇到個仔真係由個心笑出黎 ~
望梅止渴, 睇住相先啦 ~


HAHA ~ 我最中意佢比人掃風時掙扎個樣, 真係好好笑架 ~ (我是不是好變態:P)


P.S. 大家放心啦 ~
我一早已經無事啦 ~ 只是頭一星期好抑鬱!
同今個星期已開始番工了 T_T


24 則留言:

  1. 你要加油呀!你啱啱生嗰幾篇寫金得咁好笑,冇估到之後咁唔開心... 希望你已經開心番啦!你d「結論」好有用,我生時如果遇到咁嘅情況會記得你講過係好正常唔使驚,多謝你嘅sharing
    [版主回覆10/11/2012 23:08:15]已經開心番啦 ~
    只是頭一星期覺得好好好辛苦, 之後抱住 BB 已經開心番曬 ~
    你也要加油 ~ 有咩問題可以問我 ~

    回覆刪除
  2. 加油呀..媽媽~
    初頭真係好辛苦..不過當bb大左, 就開心多過辛苦架喇.
    [版主回覆10/12/2012 14:27:03]依家 99 揍, 我超輕鬆的 ~ :P

    回覆刪除
  3. 睇到都辛苦.......大家一齊加油呀!?

    你現在一次餵幾多ml奶呀!?我餵完人餵再補奶90ml奶粉,三小時一次.......
    [版主回覆10/12/2012 14:26:38]佢就 2個月啦, 依家食 165ml (有時食唔曬), 4 小時一次!

    回覆刪除
  4. 新手媽媽真係唔易做呢, 你要加油, 我會向你學習~!
    [版主回覆10/12/2012 16:21:20]唔好講學習, 互相交流 ~ ^_^

    回覆刪除
  5. 辛苦哂你呀媽媽~!!!一路睇我都覺得你好辛苦
    我都好同意, 餵奶粉唔代表唔鍚bb~ 所以你唔洗唔開心~ 大把BB都係食奶粉ga啦~
    我個仔而家又食得少, 又食得耐, 都試過換奶咀, 快左少少, 不過都有9個字, 完全明白你o既痛苦....
    有99照顧真係好~ 你可以放心啦靚媽~
    [Sharon and Benny回覆10/12/2012 20:21:28]我而家轉左pigeon 呀, 好似有d 幫助lor, 不過都真係好睇佢想唔想食...>.<
    [版主回覆10/12/2012 16:24:32]你依家用咩咀??
    其實我覺得過左頭一個月已經好好多, 因為開始摸索到自己 BB o既脾性!
    好似柑b, 惡到飛起, 佢一喊抱起佢, 比佢抓到我心口紅曬, 又一巴巴星落我個身 -__-
    到依家我會狠狠o甘用手夾實佢個身, 佢好快就收聲.
    哼! 同我鬥大力 ~

    回覆刪除
  6. 我又係咁...妹豬一喊,我個人就慌晒,同佢一齊喊,攪到要妹豬老豆出手擺平我哋2個! 我哋都係用chu chu咀,飲個幾鐘,拮多幾個孔以為會好啲,點知都係咁,餐餐同我飲個媿鐘,餵到忟!!!
    [妹豬回覆10/12/2012 18:19:25]佢日頭都重好啲,可以食到120ml,但夜晚就慘,個幾鐘都係食得80、90ml...!
    [版主回覆10/12/2012 16:28:11]我又係, 一開始我真係好燥, 有時會 : 啾! 又喊啦! (尤其深夜時份食完又唔瞓, 唔瞓之餘仲要喊 wor!)
    我老公就自己抱佢出廳, 不過依家 99 揍, 真是輕鬆好多 ~ XD

    我仔用 chu chu, 佢可以頭 50ml 用 10mins 就食完, 但之後果100ml 要食 45mins! o甘即是唔關個咀事啦?
    真是好困擾! 妹豬依家食幾安奶?

    回覆刪除
  7. 你要+油呀.湊BB真係會好多憂心既地方
    最緊要同人傾多D
    免得自己屈住呀.
    ^_^
    BB一定會乖乖的
    [版主回覆10/12/2012 16:47:34]對啊 ~ 不過開心o既事亦都好多 ~
    一見到佢隻衰豬笑, 我真係由個心笑出黎 ~
    同我成日迫 d 同事睇我個仔 d 相 XDDD

    回覆刪除
  8. 加油呀,真係有苦就同人傾訴下,吾好屈係心到!
    [版主回覆10/14/2012 11:20:51]依家放工去玩下 BB 再拍下羅友就走, 超輕鬆 XD

    回覆刪除
  9. 苦盡柑來,柑B咁得意,開心返埋嚟啦!!!!
    柑B唔準咁惡呀!!
    [版主回覆10/14/2012 11:21:39]大個左真是好少少, 不過有時都好惡, 但番左工, 見少左, 壓力都少左好多 ~

    回覆刪除
  10. 你講得好啱呀
    有唔開心一定要呻
    我初初一星期都係
    無啦啦會喊
    我有餵人奶,不過靠泵,所以係窮媽媽
    每曰得一餐人奶咁大巴
    不過已經盡唒力
    呢兩日病左唔可以靠近BB
    我又喊一大餐
    大家一齊加油
    而家我有仔萬事足
    [版主回覆10/14/2012 11:24:06]餵得一餐得一餐啦 ~
    我之前為人奶而超唔開心, 依家總算叫睇開左了 ~
    不過我同我自己講, 如果有第 2 胎, 我一定唔會補奶粉 <--- 其實仲有少少耿耿於懷XD

    回覆刪除
  11. 柑媽加油! 睇到你分享, 有多D預期呀, 好有用呀! 多謝你先! 我好快加入新手媽媽行列, 到時一齊並肩作戰丫!
    [版主回覆10/14/2012 11:26:30]係啊 ~
    佢食得多又怕佢太飽, 食得少又怕佢唔飽
    佢瞓得多又怕佢因為黃而累, 瞓得少又怕唔長肉
    肥又話怕肥, 瘦又話怕瘦
    其實根本無得擔心, 一開始好緊張, 依家放鬆了很多 ~ 你也要加油 ~~

    回覆刪除
  12. 柑媽加油呀~
    產後真的好易唔開心, 好易喊~
    我都喊左好多好多次...有時都唔知點解
    最緊要有屋企人支持呀

    返工後有冇唔捨得呀~~~有唔開心大家可以為係分擔呀
    [版主回覆10/15/2012 12:50:54]係呀, 真係咩都驚一餐, 我果昤日日都有喊 @_@
    小可力也要加油 ~

    依家 99 照顧, 我只是放工去玩下 BB, 星期6,日就幫手揍 (去 99 家渡假)
    感覺輕鬆很多也比較沒壓力 ~
    不過就辛苦 62, 99 了 ~ 要鍚佢地多 D ~ :P

    回覆刪除
  13. 新手媽媽壓力真係好大, 有時都驚輪到自己吾知會點算...
    [版主回覆10/15/2012 12:52:01]係啊 ~ 最緊要多 D 同人傾, 唔好屈o係心就 ok!

    回覆刪除
  14. 咁快要返工哪? 加油呀柑媽!~
    [版主回覆10/19/2012 17:32:05]番左 2 星期啦 ~ 我前 3後7 ~

    回覆刪除
  15. 坐月果個月真係好難捱, 辛苦過有左果陣十倍!!!!
    信相個個媽媽都身同感受
    [taynth回覆10/22/2012 10:55:11]日日生一次, 好勇敢喎, 哈~
    宜家我個囝差唔多五個月啦, 真係好左好多, 成日個都開心晒^^
    [版主回覆10/19/2012 17:33:01]我頭一個星期好抑鬱, 我果時仲諗: 寧願日日生一次仔都唔想揍仔 XD
    依家好多了 ~

    回覆刪除
  16. 頭頭幾個月照顧初生baby一定很辛苦,壓力又大,幸好你honey很細心懂得關心你!
    [版主回覆10/19/2012 17:33:17]也好彩有 62, 99 幫忙 ~

    回覆刪除
  17. 哇~~~~你咁快返工啦~恭喜你呀~~~我睇完都無咁怕~~多謝你~頂硬上~~~
    [版主回覆10/22/2012 16:25:46]番左 2個星期了 ~
    一齊加油!

    回覆刪除
  18. 莎拉蛋糕Sarah Cake2012年10月20日 下午11:47

    新手媽媽真係邊做邊學呢, 我個陶寶B都係惡Cbb, 食人奶都係食得好辛苦, 用chu chu奶樽又係食得好辛苦, 食成個鐘先食到3oz, 而家諗番真係人都癲呀, 不過到咗而家bb已大個咗好多, 見到佢開心笑, 之前既一切問題都已經過去, 所以開心咗好多呢. 所以你都要加油呀!!!
    [版主回覆10/22/2012 16:28:17]後來上網睇原來 CHU CHU 對初生係比較吃力, 因為唔想佢地覺得奶樽食得易而唔埋身食母乳 ...
    但柑 B 到依家都係好嘆奶 -_-
    4.5ozs 要 1hour ... 是不是我應轉樽比佢??

    回覆刪除
  19. "兇猛型 BB" <--- 睇到呢句真係忍唔住笑出黎!!
    [版主回覆11/06/2012 12:04:54]XDDD 惡人仔!

    回覆刪除
  20. 辛苦了媽媽!兇猛型XD haha~~
    [版主回覆11/06/2012 12:05:19]其實個個媽媽都辛苦, 不過有99幫手已經很好了 ~

    回覆刪除
  21. 好有同感,我生完頭一星期都係好抑鬱,有朝燒腩仔成晚無瞓咁滯,又係死都唔肯埋身食奶,然後老公問我做左媽媽有咩感覺,我即刻忍唔住開水喉喊到收唔到聲,好彩有健康院姑娘同朋友傾吓呻吓,唔係真係唔知會變成點﹗

    我隻仔飲開AVENT樽同咀,用CHU CHU咀都係飲唔到,飲到我同我老公都想爆粗咁滯,有人話桔住佢送之針去steam會好少少,但我無試只係轉左NUK咀,但發現效果都係唔多理想,研究緊使唔使再試PIGEON咀
    [版主回覆11/06/2012 12:04:28]頭一個月我晚晚都 SLEEP 唔到, 不過好彩早上 99 接力我先叫可以休息下!

    我仔有用過PIGEON咀, 有護翼果款, 不過阿仔唔多中意!
    依家我地用之針去steam, 真是好左好多! (CHU CHU)

    回覆刪除
  22. 柑B食奶咀张相好cute.
    柑B現在是否仍咁”兇猛”呢?

    回覆刪除
  23. 豆丁@加拿大Hamilton2013年4月11日 下午8:07

    這篇好好啊!有機會要share俾D新手媽媽睇~^^

    回覆刪除
  24. 記得第一次睇你呢篇blog時,就當係一篇經驗的分享,現在等自己都生左,才有一種感同身受的感覺。尤其係你戈句:沒有人一開始就咩都識,整到我d眼淚膨膨聲流出來,是我坐月第一次喊,因為你講既每一個事件都好到肉呀:'(
    [版主回覆05/20/2013 16:04:16]BB出左世啦? 恭喜你呀 ~
    你話由我有左開始, 到柑B依家做左大BB你都睇住佢大架MA!
    希望我o既小小分享可以對你有幫助啦~

    其實好多心情真是當了mama的人才明白, 初為人母真是好多野唔識, 好多野緊張同要學~
    但只要一見到bb幾唔開心都會開心番~ 加油!
    如果有唔開心一定要同人講啊~ 有問題也可以隨時問我~ ^_^ (如果你想也可以 whatsapp 我~) 加油加油!

    回覆刪除